" بحكم عديت 4 سنين في الفاك , قلت باش نولي نهبط بوست مرة في الفال نحكي فاها على حوايج و astuces مبنية على تجربتي الخاصة , هذا يعني أنو تجربتي مش بالضرورة هي حقائق 100% لكن هي مببنية على تجربتي الخاصة و بحثي مع قدماء المعهد أول موضوع حبيت نطرقلو هوما الستاجات ... تلقاو في البوست هذا جل ما أعرفه عن الستاجات و الجو هاكا حتى كانك مرحلة تحضيرية أقرا هذا الأرتيكل لأنو يهمكم الستاج هو فترة تدريب تحضر فاها روحك للحياة العملية , تكتسب فاها مهارات و تبني فاها علاقات مع أشخاص مهنيين ... الستاجات هوما من أهم الأركان في CV ناجح ... كل ما تعمل ستاجات أكثر كل ما خير لكن بالطبع الكثرة تشترط الجودة زادة ... هاو باش تفهمني لحظة ... الستاجات أنواع أول حاجة لازم تفهمها أنو الستاج هو فترة متع تعلم و إنجمو إنقسموه لأربعة مراحل رئيسية : Stage d'initiation à la vie professionelle : السيد هذا هوا بلغة أخرى أول ستاج عندك , أول مرة تحط ساقك في شركة و تتحط في إطار مهني , أول مرة تلتزم بأوقات عمل ... الستاج هذا يكون طولو لا يتجاوز الشهر لأنو عادة يعطيوك فيه مهام بسيطة فقط باش تتعرف على الوسط المهني و تتعلم شوية. عادة ما يطالبو منك إلا الحضور و القيام ببعض المهام. على قد ما هو ستاج هام في بداية الطالب على قد ماهو "تافه" مضمونا : في الCV الستاج هذا ما عندوش قيمة كبيرة. أما هو اللي باش يخولك مبعد تعمل : Stage technicien الستاج هذا يفترض عندك بعض الخبرة و النضج ... يكون طول الستاج هذا من شهر لشهرين .. يعطيوك فيه مهام محددة أو موضوع تخدم عليه و يتم تأطيرك ... عادة تكون إنتي تساهم في مشروع جزئيا. Stage Ingénieur الستاج هذا يفترض خبرة و مهارات متقدمة. طولو عادة لا يقل عن شهرين. توكل لك موضوع معين تتحمل فيه إنتي المسؤولية. Stage PFE ( Projet de fin d'études) أكيد كلكم سمعتو بيه , السيد هذا هو حلقة الوصل بين مسارك الدراسي الجامعي و المهني. هو ستاج الوحش بإمتياز مش على خاترو صعيب.. لكن لأنو إنتي فيه تدخل معترك الحياة , مسؤولية و مستقبل مهني على المحك. الستاج هذا عندو قدرة باش يحددلك توجهاتك و عملك في السنين القادمة و هكا علاش لازم تحضرلو مليح. طول خونا الPFE يتراوح بين الأربع أشهر و الستة أشهر. و يختم بsoutenance و تخرج من الجامعة. إمتى إنجم نعمل ستاج ؟ بالنسبة لل PFE إسمو على جسمو , تعملو في أخر سنة جامعية ( السنة الخامسة- السداسي الثاني ) أحنا باش نركزو على ستاجات الصيف فقط أمور أوراق كيفاه نعمل ستاج في الصيف ؟؟ باهي أول حاجة نستحقو أوراق من الفاك باش نعملو ستاج خاتر الشركة أو الlaboratoire أو غيرو ما يقبلنا كان ما يتأكد إلي أحنا عنا assurance بدرجة أولى و بدرجة ثانية يحبو يتأكدو إلي أحنا طلبة في مؤسسات التعليم العالي و في الإنسات فما زوز أليات قانونية باش تاخو أوراق تثبت هذا ,لذلك يلزم تفهم الفرق بين stage obligatoire و stage volontaire Stage obligatoire : هو تدرب إجباري لطلبة مرحلة تكوين المهندسين , يعني كل طالب تعدى سيكل لازمو في صيف كل عام يعمل ستاج. الستاج هذا ماينجم يعملو كان في شهر جويلية أو أوت و لمدة شهر واحد. ( لا أكثر ) إذا أنتي طالب مرحلة تكوين مهندسين و حاجتك بستاج أطول stage ingénieur مثلا , إذا لازم تقسم ستاجك شطرو بأوراق stage obligatoire و شطرو بأوراق stage Volontaire Stage Volontaire : الستاج هذا تطوعي , تنجم تعملو في كل فترة صيف ( من 1 جويلية ل 14 سبتمبر) طالما تحمل صفة طالب , يعني تنجم تعمل ستاج من العام الأول في الإنسات. كيفاه ندبر ستاج و شنوما المراحل اللي نمر بيهم ألقا ستاج أول حاجة تأكد أنو الإنسات مش باش تعاونك باش تلقى حتى ستاج إنتي إمشي شوف الشركات و أعمل contacts في هذي المرحلة تبرز أهمية شبكة علاقاتك و ما إكتسبتو من معارف من النوادي , الأنشطة أو حتى من أصدقاء و عائلة تستحق في هذه المرحلة إنك تحدد شنوة هدفك , شنوة الستاج اللي تلوج عليه , شنية الشركة اللي تحب علاها . حضر الCV و هز الlettre de liaison من الإنسات : إذا stage obligatoire تستحق الورقة هذي http://www.insat.rnu.tn/upload/1559283976.pdf إذا stage volontaire تستحق الورقة هذي (1st DOC) و إمشي للشركة , قابل RH ولا مسؤول , كلم قريب ... تصرف أحسن وقت للقيام بالمرحلة هذي هي شهر مارس كان تفاهمت مع الشركة و قبلوك , مدلهم الورقة هذي يعمروها و يعطيوهالك (2nd Doc)
Lettre de liaison Stage Volontaire.pdf